4 митови за протеинската исхрана и научните ставови за нив

Науката за фитнесот констатно напредува и со тоа ги поткрепува или побива тврдењата што можете да ги слушнете низ неформалните муабети. Протеинската исхрана е веќе докажана како корисна за физички активните луѓе, но никогаш не е на одмет да размислувате критички и да истражувате. Следат 4 митови за ефектите врз здравјето од исхраната базирана на протеини и одговорите од науката:

1. Протеинската исхрана ќе ве здебели

Овој мит е многу далеку од вистината 🙂 Внесувањето на најголемиот дел од калориите во облик на протеини ќе ви помогне да ја зголемите чистата мускулна маса и да се ослободите од вишокот масти. Дури и ако земате количина на протеини што го надминува препорачаниот дневен внес на калории за вас, нема да се здебелите. Напротив, ќе намалите на телесна тежина и тоа од губење на масти.

Ова го потврдуваат две различни истражувања, а во едното од нив учесниците биле „прејадувани“ со whey протеин. Кај двете истражувања резултатите покажуваат само согорување на масти, во ниту еден случај дебелеење.

митови за протеинската исхрана 3

2. Протеинската исхрана ги оштетува бубрезите

Сте слушнале коментар од типот „полека со протеинските шејкови, ќе си ги уништиш бубрезите“? Јас да, а изгледа и многу други, бидејќи е спроведено истражување конкретно на оваа тема – каков ефект има врз крвта и бубрезите секојдневното внесување по 4 грама протеин по килограм телесна тежина.

Резултатите покажуваат дека луѓе кои се здрави и редовно вежбаат со тежини немаат никаков негативен ефект од протеинската исхрана. Учесниците во истражувањето земале во просек по 270 грама протеини дневно во текот на 8 недели, додека продолжиле со нормален внес на другите нутриенти. По ова не се покажале никакви промени во крвната слика и во состојбата на бубрезите.

3. Протеинската исхрана предизвикува ронење на коските

Од некоја причина овој мит долго се провлекуваше и подалеку од маалските муабети. Се базира на мислењето дека протеинот предизвикува закиселување на крвта, што резултира со црпење на калциум од коските за да се регулира  крвта, а тоа пак води кон слабеење и ронење на коските.

Но, истражувањата го побиваат ова мислење. Високопротеинската исхрана не предизвикува промени во биомаркерите на содржината на коските. Напротив, протеините ја зголемуваат апсорпцијата на калциум во дигестивниот тракт. Зголемениот калциум поттикнува лачење на калцитонин од тироидата и складирање на калциумот во коскеното ткиво. Заклучокот е дека протеинската исхрана може да го подобри здравјето на коските.

митови за протеинската исхрана 1

4. Протеинската исхрана предизвикува непријатни мириси

Ова тврдење е точно само во случај на исхрана базирана на многу протеини и минимални количини на јаглехидрати и масти. Во тој случај, вашата пот може да мириса на амонијак бидејќи преку неа телото ќе исфрла голема количина на уреа при високоинтензивни тренинзи. Ако се соочите со ваков проблем само додајте малку здрави масти и јаглехидрати во исхраната.

Други поплаки на оваа тема се појавуваат во однос на мирисот на здивот, но тие се решаваат со четка и паста за заби. 🙂

Leave a Reply

Your email address will not be published. Required fields are marked *